Tigrai Academy

ኣሜሪካ ብዝፈፀመቶ ደብዳብ ኣየር ዕጡቓት ሁቲ ኣብ ዝቆፃፀርዎ ሰሚናዊ ምዕራብ የመን ኣብ ዝርከብ ማእኸል መዳጎኒ ስደተኛታት ዝነበሩ ኢትዮጵያውያን ሓዊሱ ልዕሊ 68 ስደተኛታት ከምዝተቐተሉ ሮይቶርስ ፀብፂቡ።

ብዕጡቓት ሁቲ ከም ዝመሓደር ኣብ ዝተገለፀ ናይ የመን ቴሌቭዥን ጣብያ ካብቲ ደብዳብ ዝተፈፀመሉ ቦታ ዝወፅኡ ጉድኣት ዝበፅሖም ስደተኛታት ካብቲ ፍረስራስ እንትወፅኡ ኣብ ዝረኣየሉ ስርጭት ብኣምሓርኛ “ወይኔ እናቴ” ዝብል ድምፂ ዘስምዕ ዝቖሰለ ስደተኛ ከምዝነበረ ፀብፃብ ሮይተርስ ይሕብር።

ኣብቲ ደብዳብ ልዕሊ 68 ስደተኛታት ከምዝተቐተሉ ዝተገለፀ እንትኾን ዑጡቓት ሁቲ እቲ ደብዳብ ኣሜሪካ ከምዝፈፀመቶ ምግላፆም ተሓቢሩ።

ብተወሳኺ እቲ ፀብፃብ ልዕሊ 47 ሰባት ከምዝቖሰሉ ዝገለፀ እንትኾን እቲ ቴሌቭዥኝ ጣብያ ካብቲ ደብዳብ ዝተፈፀመሉ ቦታ በቲ ሓደጋ ኣሰቃቒ ጉድኣት ዝበፅሖም ስደተኛታት እንትወፅኡ የርኢ ከምዝነበረ የመላኽት።

ፀብፃብ ሮይተርስ እቲ ናይ ኣየር ደብዳብ ዝተፈፀመሉ ቦታ ኢትዮጵያን ሓዊሱ ብዙሓት ስደተኛታት ናብ ስዑዲ ዓረብ ዝገብርዎ ዘይሕጋዊ ጉዕዞ ዋና መንገዲ ከምዝኾነ ዝጠቐሰ እንትኾን እቶም ስደተኛታት “ሳዳ” ኣብ ዝተብሃለ ዘይሕጋዊ መዕገቲ ስደተኛታት ከምዝነበሩን መስካሕክሒ ዝብሃል ጉድኣት ከምዝበፅሖምን ወሲኹ ሓቢሩ።

ካብዞም 68 ዝሞቱ ስደተኛታት በዝሒ ኢትዮጵያዊያን ክንደይ ከምዝኾነ ብኑፁር ዘይተገለፀ እንትኾን ሮይተርስ ነዚ ኣመልኪቱ ንሓደ ናይ ሰራዊት ኣሜሪካ በዓል ሰልጣን ሓቲቱ ኣብ ልዕሊ ሲቪልያን ዝበፅሐ ጉድኣት ከምዘይፈልጥ ከምዝነገሮ ፀብፂቡ።